Меню сайта
Категории раздела
| Антология Русской Мысли [533] |
| Собор [345] |
| Документы [12] |
| Русская Мысль. Современность [783] |
| Страницы истории [358] |
| Антология Русской Мысли [533] |
| Собор [345] |
| Документы [12] |
| Русская Мысль. Современность [783] |
| Страницы истории [358] |
ПЛАЧ ПОКАЯННЫЙ
Глаголы моя внуши, Господи, разумей звание мое. Вонми гласу моления моего, Царю мой и Боже мой, яко к Тебе помолюся, Господи. Заутра услыши глас мой, заутра предстану Ти, и узриши мя. (Пс 5:2-4.) Припев: Помилуй мя, Боже, помилуй мя. Господи, да не яростию Твоею обличиши мене, ниже гневом Твоим накажеши мене. Помилуй мя, Господи, яко немощен есмь, исцели мя, Господи, яко смятошася кости моя. И душа моя смятеся зело; и Ты, Господи, доколе? Обратися, Господи, избави душу мою; спаси мя ради милости Твоея. Яко несть в смерти поминаяй Тебе; во аде же кто исповестся Тебе? (Пс.6:2-6.) Воскресни, Господи, Боже мой, да вознесется рука Твоя, не забуди убогих Твоих до конца (Пс.9:33.) Ты, Господи, сохраниши ны и соблюдеши ны от рода сего и во век (Пс.11:8). Призри, услыши мя, Господи, Боже мой, просвети очи мои, да не когда усну в смерть, да не когда речет враг мой: укрепихся на него. Стужающии ми возрадуются, аще подвижуся. Аз же на милость Твою уповах. Возрадуется сердце мое о спасении Твоем, воспою Господеви, благодеявшему мне, и пою имени Господа Вышняго (Пс.12:4-7). Соверши стопы моя во стезях Твоих, да не подвижутся стопы моя (Пс.16:5). Удиви милости Твоя, спасаяй уповающыя на Тя от противящихся деснице Твоей. Сохрани мя, Господи, яко зеницу ока, в крове крилу Твоею покрыеши мя, от лица нечестивых, острастших мя. Врази мои душу мою одержаша, тук свой затвориша, уста их глаголаша гордыню. Изгонящии мя ныне обыдоша мя, очи свои возложиша уклонити на землю. Объяша мя, яко лев готов на лов, и яко скимен, обитаяй в тайных. Воскресни, Господи, предвари я, и запни им, избави душу мою от нечестиваго, оружие Твое от враг руки Твоея (Пс.16:7-13). Грехопадения кто разумеет? От тайных моих очисти мя, и от чуждих пощади раба Твоего (Пс.18:13). Ты же во Святем живеши, хвало Израилева. На Тя уповаша отцы наши, уповаша и избавил еси я. К Тебе воззваша, и спасошася, на Тя уповаша, и не постыдешася (Пс.21:4-6). Да не отступиши от мене, яко скорбь близ, яко несть помогаяй ми (Пс.21:12). Господи, не удали помощь Твою от мене, на заступление мое вонми. Избави от оружия душу мою, и из руки песии единородную мою. Спаси мя от уст Львовых и от рог едино-рожь смирение мое (Пс.21:20-22). Помяни щедроты Твоя, Господи, и милости Твоя, яко от века суть. Грех юности моея и неведения моего не помяни, по милости Твоей помяни мя Ты, ради благости Твоея, Господи (Пс.24:6-7). Скорби сердца моего умножишася, от нужд моих изведи мя. Виждь смирение мое и труд мой, и остави вся грехи моя. Виждь врага моя, яко умнбжишася (Пс.24:17-19). Сохрани душу мою, и избави мя, да не постыжуся, яко уповах на Тя (Пс.24:20). Услыши, Господи, глас мой, имже воззвах: помилуй мя и услыши мя. Тебе рече сердце мое: Господа взыщу. Взыска Тебе лице мое, лица Твоего, Господи, взыщу. Не отврати лица Твоего от мене и не уклонися гневом от раба Твоего; помощник мой буди, не отрини мене, и не остави мене, Боже, Спасителю мой. Яко отец мой и мати моя остависта мя, Господь же восприят мя. Законоположи ми, Господи, в пути Твоем, и настави мя на стезю правую враг моих ради. Не предаждь мене в душы стужающих ми: яко воссташа на мя свидетеле неправеднии, и солга неправда себе. Верую видети благая Господня на земли живых. Потерпи Господа, мужайся, и да крепится сердце твое, и потерпи Господа (Пс.26:7-14). На Тя, Господи, уповах, да не постыжуся во век: правдою Твоею избави мя и изми мя. Приклони ко мне ухо Твое, ускори изъяти мя: буди ми в Бога Защитителя и в дом прибежища, еже спасти мя. Яко держава моя и прибежище мое еси Ты, и имене Твоего ради наставиши мя и препитаеши мя. Изведеши мя от сети сея, юже скрыша ми: яко Ты еси Защититель мой, Господи. В руце Твои предложу дух мой: избавил мя еси, Господи Боже истины. Возненавидел еси хранящыя суеты вотще; аз же на Господа уповах. Возрадуюся и возвеселюся о милости Твоей, яко призрел еси на смирение мое, спасл еси от нужд душу мою (Пс.30:1-8). К Тебе, Господи, воззову, Боже мой, да не премолчиши от мене, да не когда премолчиши от мене, и уподоблюся низходящым в ров. Услыши, Господи, глас моления моего, внегда молити ми ся к Тебе, внегда воздети ми руце мои к храму святому Твоему. Не привлецы мене со грешники и с делающими неправду не погуби мене, глаголющими мир с ближними своими, злая же в сердцах своих (Пс.27:1-3). Просвети лице Твое на раба Твоего, спаси мя милостию Твоею. Господи, да не постыжуся, яко призвах Тя (Пс.30:17-18). Ты еси прибежище мое от скорби, обдержащия мя: радосте моя, избави мя от обышедших мя (Пс.31:7). Яко беззакония моя превзыдоша главу мою, яко бремя тяжкое отяготеша на мне. Возсмердеша и согниша раны моя от лица безумия моего. Пострадах и слякохся до конца, весь день сетуя хождах (Пс.37:5-7). Господи, пред Тобою все желание мое, и воздыхание мое от Тебе не утаися. Сердце мое смятеся, остави мя сила моя, и свет очию моею, и той несть со мною (Пс.37:10-11). Не остави мене, Господи Боже мой, не отступи от мене. Вонмй в помощь мою, Господи спасения моего (Пс 37:22). Одержаша мя злая, имже несть числа, постигоша мя беззакония моя, и не возмогох зрети, умножишася паче влас главы моея, и сердце мое остави мя. Благоволи, Господи, избавити мя: Господи, во еже помощи ми вонми. Да постыдятся и посрамятся вкупе ищущии душу мою изъяти ю, да возвратятся вспять и постыдятся хотящий ми злая. Да приимут абие студ свой глаголющии ми: бла-гоже, благоже. Да возрадуются и возвеселятся о Тебе вси ищущии Тебе, Господи, и да рекут выну: да возвеличится Господь, любящии спасение Твое. Аз же нищ есмь и убог, Господь попечется о мне. Помощник мой и Защититель мой еси Ты, Боже мой, не закосни (Пс.39:13-18). Услыши ны, Боже, Спасителю наш, упование всех концев земли, и сущих в мори далече (Пс.64:6). Боже, ущедри ны и благослови ны, просвети лице Твое на ны и помилуй ны (Пс.66:2). Спаси, мя, Боже, яко внидоша воды до души моея. Углебох в тимении глубины, и несть постояния. Приидох во глубины морския, и буря потопи мя (Пс.68:2-3). Услыши мя, Господи, яко блага милость Твоя: по множеству щедрот Твоих призри на мя. Не отврати лица Твоего от отрока Твоего, яко скорблю, скоро услыши мя. Вонми души моей, и избави ю (Пс.68:17-19). Не отвержи мене во время старости: вне-гда оскудевати крепости моей, не остави мене. Яко реша врази мои мне, и стрегущии душу мою совещаша вкупе, глаголюще: Бог оставил есть его, пожените и имите его, яко несть избавляяй. Боже мой, не удалися от мене, Боже мой, в помощь мою вонми. Да постыдятся и исчезнут оклеветающии душу мою, да облекутся в студ и срам ищущии злая мне (Пс.70:9-13). Что бо ми есть на небеси? И от Тебе что восхотех на земли? Исчезе сердце мое и плоть моя, Боже сердца моего, и часть моя, Боже, во век (Пс.72:25-26). Да не возвратится смиренный посрамлен, нищ и убог восхвалита имя Твое. Востани, Боже, суди прю Твою, помяни поношение Твое, еже от безумнаго весь день. Не забуди гласа молитвенник Твоих, гордыня ненавидящих Тя взыде выну (Пс.73:21-23). Не помяни наших беззаконий первых: скоро да предварят ны щедроты Твоя, Господи, яко обнищахом зело. Помози нам, Боже, Спасителю наш, славы ради имени Твоего, Господи, избави ны, и очисти грехи наша имене ради Твоего (Пс.78:8-9). Воздвигни силу Твою и прииди во еже спасти нас. Боже, обрати ны и просвети лице Твое, и спасемся (Пс.79:3-4). Благоволил еси, Господи, землю Твою, возвратил еси плен Иаковль, оставил еси беззакония людей Твоих, покрыл еси вся грехи их. Укротил еси весь гнев Твой, возвратился еси от гнева ярости Твоея. Возврати нас, Боже спасений наших, и отврати ярость Твою от нас. Еда во веки прогневаешися на ны? Или простреши гнев Твой от рода в род? Боже, Ты, обращься, оживиши ны, и людие Твои возвеселятся о Тебе. Яви нам, Господи, милость Твою, и спасение Твое даждь нам. Услышу, что речет о мне Господь Бог: яко речет мир на люди Своя и на преподобныя Своя, и на об-ращающыя сердца к Нему (Пс.84:2-9). Господи Боже спасения моего, во дни воззвах и в нощи пред Тобою: да внидет пред Тя молитва моя, приклони ухо Твое к молению моему. Яко исполнися зол душа моя, и живот мой аду приближися (Пс.87:2-3). Приклони, Господи, ухо Твое, и услыши мя, яко нищ и убог есмь аз (Пс.85:1). Кто весть державу гнева Твоего, и от страха Твоего ярость Твою исчести? Десницу Твою тако скажи ми, и окованныя сердцем в мудрости. Обратися, Господи, доколе? И умолен буди на рабы Твоя (Пс.89:11-13). Господи, услыши молитву мою, и вопль мой к Тебе да приидет. Не отврати лица Твоего от мене; воньже аще день скорблю, приклони ко мне ухо Твое; воньже аще день призову Тя, скоро услыши мя. Яко исчезоша яко дым дние мои, и кости моя яко сушило сосхошася (Пс.101:2-4). Открый очи мои, и уразумею чудеса от закона Твоего. Пришлец аз есмь на земли, не скрый от мене заповеди Твоя (Пс.118:18-19). Воздрема душа моя от уныния, утверди мя в словесех Твоих. Путь неправды отстави от мене, и законом Твоим помилуй мя (Пс.118:28-29). Путь оправданий Твоих вразуми ми, и поглумлюся в чудесех Твоих (Пс.118:27). Вразуми мя, и испытаю закон Твой, и сохраню и всем сердцем моим. Настави мя на стезю заповедей Твоих, яко тую восхотех. Приклони сердце мое во свидения Твоя, а не в лихоимство. Отврати очи мои, еже не видети суеты, в пути Твоем живи мя. Постави рабу Твоему слово Твое в страх Твой. И да приидет на мя милость Твоя, Господи, спасение Твое по словеси Твоему (Пс.118:34-37, 41). Помолихся лицу Твоему всем сердцем моим: помилуй мя по словеси Твоему. Милости Твоея, Господи, исполнь земля, оправданием Твоим научи мя (Пс.118:58, 64). Благости и наказанию, и разуму научи мя, яко заповедем Твоим веровах (Пс.118:66). Благ еси Ты, Господи, и благостию Твоею научи мя оправданием Твоим (Пс.118:68). Руце Твои сотвористе мя, и создасте мя: вразуми мя, и научуся заповедем Твоим (Пс.118:73). Буди же милость Твоя да утешит мя по словеси Твоему рабу Твоему. Да приидут мне щедроты Твоя, и жив буду, яко закон Твой поучение мое есть (Пс.118:76-77). Буди сердце мое непорочно во оправданиих Твоих, яко да не постыжуся (Пс.118:80). Твой есмь аз, спаси мя, яко оправданий Твоих взысках (Пс.118:94). Заступи мя по словеси Твоему, и жив буду, и не посрами мене от чаяния моего; помози ми, и спасуся, и поучуся во оправданиях Твоих выну (Пс.118:116-117). Призри на мя и помилуй мя, по суду любящих имя Твое. Стопы моя направи по словеси Твоему, и да не обладает мною всякое беззаконие. Избави мя от клеветы человеческия, и сохраню заповеди Твоя. Лице Твое просвети на раба Твоего и научи мя оправданием Твоим (Пс.118:132-135). Воззвах всем сердцем моим, услыши мя, Господи, оправдания Твоя взыщу. Воззвах Ти, спаси мя, и сохраню свидения Твоя. Глас мой услыши, Господи, по милости Твоей, по судьбе Твоей живи мя (Пс.118:145-146, 149). Да приближится моление мое пред Тя, Господи, по словеси Твоему вразуми мя. Да внидет прошение мое пред Тя, Господи, по словеси Твоему избави мя. Отрыгнут устне мои пение, егда научиши мя оправданием Твоим. Провещает язык мой словеса Твоя, яко вся заповеди Твоя правда. Да будет рука Твоя еже спасти мя, яко заповеди Твоя изволих. Возжелах спасение Твое, Господи, и закон Твой поучение мое есть. Жива будет душа моя, и восхвалит Тя, и судьбы Твоя помогут мне. Заблудих, яко овча погибшее: взыщи раба Твоего, яко заповедей Твоих не забых (Пс.118:169-176). К Тебе возведох очи мои, живущему на небеси (Пс.122:1). Возврати, Господи, пленение наше, яко потоки югом (Пс.125:4). Из глубины воззвах к Тебе, Господи, Господи, услыши глас мой. Да будут уши Твои внемлюще гласу моления моего. Аще беззакония назриши, Господи, Господи, кто постоит? Яко у Тебе очищение есть (Пс.129:1-3). Помяни, Господи, Давида, и всю кротость его (Пс.131:1). Господи, воззвах к Тебе, услыши мя: вонми гласу моления моего, внегда воззвати ми к Тебе. Да исправится молитва моя, яко кадило пред Тобою, воздеяние руку моею, жертва вечерняя. Положи, Господи, хранение устом моим, и дверь ограждения о устнах моих. Не уклони сердце мое в словеса лукавствия, непщевати вины о гресех, с человеки делающими беззаконие (Пс.140:1-4). Сохрани мя от сети, юже составиша ми, и от соблазн делающих беззаконие (Пс.140:9). Гласом моим ко Господу воззвах, гласом моим ко Господу помолихся. Пролию пред Ним моление мое, печаль мою пред Ним возвещу (Пс.141:2-3). Господи, услыши молитву мою, внуши моление мое во истине Твоей, услыши мя в правде Твоей, и не вниди в суд с рабом Твоим, яко не оправдится пред Тобою всяк живый. Яко погна враг душу мою, смирил есть в землю живот мой, посадил мя есть в тёмных, яко мертвыя века. И уны во мне дух мой, во мне смятеся сердце мое. Помянух дни древния, поучихся во всех делех Твоих, в творениих руку Твоею поучахся. Воздех к Тебе руце мои, душа моя, яко земля безводная Тебе. Скоро услыши мя, Господи, исчезе дух мой; не отврати лица Твоего от мене, и уподоблюся низходящым в ров. Слышану сотвори мне заутра милость Твою, яко на Тя уповах. Скажи мне, Господи, путь, воньже пойду, яко к Тебе взях душу мою. Изми мя от враг моих, Господи, к Тебе прибегох. Научи мя творити волю Твою, яко Ты еси Бог мой. Дух Твой Благий наставит мя на землю праву. Имене Твоего ради, Господи, живиши мя; правдою Твоею изведеши от печали душу мою. И милостию Твоею потре-биши враги моя, и погубиши вся стужающыя души моей; яко аз раб Твой есмь (Пс. 142). Услыши, Господи, очисти, Господи, вонми, Господи, и сотвори, и не закосни Тебе ради (Дан.9:19). КАНОН ПОКАЯННЫЙ Господи Боже мой, спаси душу раба Твоего, который кровию Твоею омыт, и отверзи ему двери царствия небеснаго. Бога никтоже нигдеже виде. Аще друг друга любим, Бог в нас пребывает, и любы Его совершенна есть в нас. О сем разумеем, яко в Нем пребываем, и Той в нас, яко от Духа Своего дал есть нам. Глубоко сердце (человеку) паче всех, (и человек есть), и кто познает его? От стражи утренния до нощи, от стражи утренния да уповает Израиль на Господа: яко у Господа милость и многое у Него избавление, и Той избавит Израиля от всех беззаконий его. Глас 6 Песнь 1.Ирмос: Яко по суху пешешествовав Израиль, по бездне стопами, гонителя фараона видя потопляема, Богу победную песнь поим, вопияше. Припев: Помилуй мя, Боже, помилуй мя. Множества содеянных мною лютых помышляя, окаянный, трепещу страшнаго дне суднаго; но надеяся на милость благоутробия Твоего, яко Давид вопию Ти: помилуй мя, Боже, по велицей Твоей милости. Покаяния отверзи ми двери, Жизнодавче: утренюет бо дух мой ко храму святому Твоему, храм носяй телесный весь осквернен; но яко щедр, очисти благоутробною Твоею милостию. Слава: Вседержителю Господи, вем, коли-ко могут слезы: Езекию от врат смертных возведоша, грешную от многолетных согрешений избавиша, мытаря паче фарисея оправдаша, и молюся: с ними причтав, помилуй мя. И ныне: На спасения стези настави мя, Богородице: студными бо окалях душу грехми и в лености все житие мое иждих; но Твоими молитвами избави мя от всякия нечистоты. Песнь 3.Ирмос: Несть свят, якоже Ты, Господи Боже мой, вознесши рог верных Твоих, Блаже, и утвердивый нас на камени исповедания Твоего.
Яко блудный сын приидох и аз, Щедре, житие мое все иждивый, во отшествии расточих богатство, еже дал ми еси, Отче: приими мя, кающагося, Боже, и помилуй мя. Объятия ныне Отеческая простер, приими, Господи, и мене, якоже блуднаго, Щедре, яко да благодарно прославлю Тя. Слава: Слава Тебе, не погубившему мя доселе; слава Тебе, потерпевшему согрешения моя! Но приими мя, обращающагося, Благоутробне Отче, Сыне Единородный, Душе Святый, Создателю и Господи мой, и помилуй мя. И ныне: На мне, Боже, показав всю благостыню, презри моих множество согрешений, яко Благодетель, Божественными Матере Твоея мольбами. Песнь 4.Ирмос: Христос моя сила, Бог и Господь, честная Церковь боголепно поёт, взывающи от смысла чиста, о Господе празднующи.
Увы мне, кто буду, что содею, грех содевая и Владыки не устрашахся безсовестный; сего ради прежде суда осужден есмь. Правосуде Благий, обратив, мя спаси, паче всех человек Тебе прогневавшаго. Согреших, Господи, согреших Тебе, очисти мя! Несть бо кто, иже согреши в человецех, егоже не превзыдох прегрешеньми. Слава: Человеколюбче, хотяй всем спастися, Ты воззови мя и приими, яко благ, кающагося. И ныне: Господи, Господи, Егоже вся ужасаются и трепещут от лица силы Твоея, Тебе припадаю, Безсмертне, Тебе молюся, Святый, спаси душу мою молитвами святых Твоих и Богородицы. Песнь 5.Ирмос: Божиим светом Твоим, Блаже, утренюю-щих Ти души любовию озари, молюся, Тя ведети, Слове Божий, истиннаго Бога, от мрака греховнаго взывающа.
Отвержен во глубокую пучину сластей, Твоего благоутробия бездну призываю, Управителю, спаси мя. Благоутробия Источниче, даждь ми ныне умиление и воздыхание, яко да восплачу злых моих безмерная моря. Слава: Время живота моего мало и исполнено болезней и лукавства, но в покаянии мя приими и в разум призови, да не буду стяжание, ни брашно чуждему, Спасе, Сам мя ущедри. И ныне: Ты еси оружие наше, и стена, Богородице Дево, Ты еси заступление к Тебе притекающих, Тя и ныне в молитву движу, да избавлюся врагов моих. Песнь 6.Ирмос: Житейское море, воздвизаемое зря напастей бурею, к тихому пристанищу Твоему притек, вопию Ти: возведи от тли живот мой, Многомилостиве.
Умилосердися, спаси мя, Сыне Божий, помилуй, беснующыяся словом исцеливый, глас же благоутробный, яко разбойнику, мне рцы: аминь, глаголю тебе, со Мною будеши в раи, егда прииду во славе Моей. Достойных покаяния плодов не истяжи от мене, ибо крепость моя во мне оскуде. Сердце мне сокрушенное даруй, нищету же духовную, да сия Тебе принесу, яко приятную жертву, Едине Спасе. Слава: Не имам дерзновения, Человеколюбче, воззрети и видети безмерную высоту, согрешив на небо, ни нарещися сын Твой, блудный, но ущедри мя туне, имеяй безмерную милость. И ныне: Судию, Егоже родила еси, Дево Марие, умоли в час суда мя ущедрити, Чистая, и спасти осужденнаго, едина Предстательнице роду человеческому. Кондак
Душе моя, почто грехи богатееши, почто волю диаволю творйши, в чесом надежду полагаеши? Престани от сих и обратися к Богу, с плачем зовущи: милосерде Господи, помилуй мя грешнаго. Песнь 7.Ирмос: Росодательну убо пещь содела Ангел преподобным отроком, халдеи же опаляющее веление Божие, мучителя увеща вопити: благословен еси, Боже отец наших.
Воззрети очима на небо не смею, окаянный аз, от лукавых моих деяний, но, яко мытарь, стеня взываю ти: очисти мя грешнаго и фарисейскаго лицемерия избави мя, един благоутробен, отцев Боже. Разбиша ум мой разбойницы, и оставиша мя в язвах, еле жива, прегрешений моих, но исцели мя, отцев Боже. Слава: Безплодие зря многоболёзненныя души моея, еще потерпи, Христе, и не посецы мене, якоже смоковницу оную проклятую, отцев Боже. И ныне: Даждь ми помощь, молитвами Твоими, Всечистая, прилоги отражающи лютых обстояний. Песнь 8Ирмос: Из пламене преподобным росу источил еси и праведнаго жертву водою попалил еси: вся бо твориши, Христе, токмо еже хотети; Тя превозносим во вся веки.
Камень отвалив ожесточения, Господи, от моего сердца, умерщвленную страстьми воздвигни душу мою, Благий, и принести Тебе ваия, яко Победителю ада, во умилении, Владыко, сподоби: яко да вечный живот улучу, Едине Человеколюбче, песнословя Твою державу и благоутробие Твое во вся веки. Неподобными обогатихся, окаянный, помышленьми, душу оскверних беззаконными сластьми, и тьма окружает мя отчаяния: озари мне сияние, Боже мой, покаяния, яко да прославлю Тя благодарно во вся веки. Слава: Греховным недугом истаяваем, на одре отчаяния низлежу; темже мя, Врачу болящих, посети Твоим человеколюбием и не остави мя уснути люте в смерть, Всещедрый, да вопию Тебе, милости Подателю: Господи, слава Тебе. И ныне: Мати Божия, Всесвятая, Стено христиан, избави раба Твоего, обычно зовущаго Ти прилежно, противостани скверным и возносливым помыслом, да вопию Ти: радуйся, Приснодево! Песнь 9.Ирмос: Бога человеком невозможно видети, на Негоже не смеют чини Ангельстии взирати; Тобою же, Всечистая, явися человеком Слово Воплощенно, Его же величающе, с небесными вои Тя ублажаем.
К Тебе прибегаю, Иисусе Сыне Божий, мене ради, окаяннаго, рабий зрак приемый: предстательством Безплотных Твоих помилуй мя. К Тебе припадаю, Избавителю мой, молитвами Предтечи Твоего и всех Твоих пророков и праотцев помилуй мя. К Тебе воздыхаю, Человеколюбче, грешников едино прибежище и надежда, Спасе всех, моленьми учеников Твоих, Тебе, Спаса нам проповедавших, помилуй мя. К Тебе воздею руце мои, пострадавый за грешников, Сыне Божий, молитвами мучеников Твоих, кровь свою Тебе ради излиявших, помилуй мя. Слава: Несмь достоин воззрети и видети высоту небесную от множества неправд моих, слячен многими ужами железными, во еже не возвести главы моея. Но, о Благоутробный Господи, на мне яви всю благость Твою и недостойна суща спаси и помилуй молитвами преподобных Твоих. И ныне: За благость Твою от Пресвятыя Девы родитися и на земли с человеки пожити изволивый, Слове Божий, Тоя предстательством и всех святых Твоих, от века Тебе угодивших, помилуй мя. МОЛИТВА - БЛАГОДАРЕНИЕ ИЗ ДУХОВНОГО ЗАВЕЩАНИЯ Слава Богу за все! Слава Богу, что меня создал по образу Своему и по подобию! Слава Богу, что меня, падшего, искупил! Слава Богу, что обо мне, недостойном, промышлял! Слава Богу, что меня, согрешившего, в покаяние призвал! Слава Богу, что мне подал слово Свое святое, как «светильник, сияющий в темном месте» (2 Петр 1:19), и тем меня на путь истинный наставил! Слава Богу, что мои очи сердечные просветил! Слава Богу, что подал мне в познание святое имя Свое! Слава Богу, что банею Крещения грехи мои омыл! Слава Богу, что показал мне путь к вечному блаженству! Путь же есть Иисус Христос, Сын Божий, Который о Себе говорит: «Я есмь путь и истина и жизнь» (Ин 14:6). Слава Богу, что согрешающего меня не погубил, но по Своей благости потерпел согрешения мои! Слава Богу, что показал мне прелесть и суету мира сего! Слава Богу, что помогал мне в многоразличных искушениях, бедах и напастях! Слава Богу, что при бедственных и смертельных случаях меня сохранял! Слава Богу, что меня от врага, дьявола, защищал! Слава Богу, что меня лежащего восставлял! Слава Богу, что меня печального утешал! Слава Богу, что меня заблуждающегося обращал! Слава Богу, что меня отечески наказывал! Слава Богу, что мне объявил Страшный Свой Суд, чтобы я его боялся и каялся в грехах моих! Слава Богу, что объявил мне вечную муку и вечное блаженство, чтобы одной избежать, а другого поискать! Слава Богу, что мне, недостойному, подавал пищу, которою немощное мое тело укреплялось; подавал одежду, которою нагое мое тело покрывалось, подавал дом, в котором я упокоевался! Слава Богу и за прочие Его блага, которые Он мне для содержания и утешения моему подавал! Столько я от Него получил благодеяний, сколько дышал! Слава Богу за все! | |
|
| |
| Просмотров: 911 | |
